Արմավիրի մարզպետի աշխատակազմ

Այսօր Արմավիրի մարզպետ Արգիշտի Մեխակյանը հանդիպում է ունեցել մարզում գործող հասարակական կազմակերպությունների ղեկավարների հետ՝ նպատակ ունենալով խորացնել համագործակցությունը պետական և քաղաքացիական հասարակության կառույցների միջև, քննարկել իրականացվող ծրագրերը, բարձրացված խնդիրները և առաջիկա փոխգործակցության հնարավորությունները։
Հանդիպման ընթացքում մարզպետը կարևորել է հասարակական կազմակերպությունների դերը համայնքների զարգացման, սոցիալական խնդիրների լուծման, երիտասարդական ծրագրերի իրականացման և ժողովրդավարական արժեքների խթանման գործում։
Կազմակերպությունների ներկայացուցիչները ներկայացրել են իրենց գործունեության հիմնական ուղղությունները՝ խոսելով ինչպես արդեն իրականացված, այնպես էլ ընթացիկ և նախատեսվող ծրագրերի մասին։
Քննարկվել են նաև մի շարք կոնկրետ առաջարկություններ՝ համատեղ միջոցառումների կազմակերպման, շահառուների շրջանակի ընդլայնման և տեղեկատվության փոխանակման արդյունավետ մեխանիզմների ներդրման վերաբերյալ։
Հանդիպման ավարտին կողմերը վերահաստատել են իրենց պատրաստակամությունը՝ կառուցողական համագործակցությամբ նպաստել մարզի կայուն զարգացմանը։