Արմավիրի մարզպետի աշխատակազմ

Սիրելի՜ ուսուցիչներ, մանկավարժներ, կրթության ոլորտի հարգելի՛ նվիրյալներ,

Ջերմորեն շնորհավորում եմ ձեզ մասնագիտական տոնի՝ Ուսուցչի օրվա առթիվ:

Մեր հասարակության մեջ ուսուցչի առաքելությունն սկզբից ևեթ ունեցել է բացառիկ նշանակություն: Գաղտնիք չէ, որ հայ ժողովուրդը մշտապես կրթությունը համարել է ազգային ինքնությունը պահպանելու և զարգացնելու ամենահուսալի հենասյունը։ Չկա ավելի պատվաբեր, բայց և միաժամանակ ավելի պատասխանատու գործ, քան աշակերտ կրթելու, մտածող անհատ ու մեր երկրի արժանապատիվ քաղաքացի ձևավորելու դժվարին ու վեհ ճանապարհը:

Իմ խորին երախտագիտությունն եմ հայտնում մեր մարզի բոլոր կրթօջախների աշխատակիցներին՝ մարզում կրթության որակի բարձրացման, նորարարական մոտեցումների ներդրման և մատաղ սերնդին հայեցի ու համամարդկային արժեքներով դաստիարակելու համար։

Մենք լավ ենք գիտակցում, որ ուժեղ և զարգացած պետություն, մարզ և համայնք ունենալու համար առաջին հերթին անհրաժեշտ է զարգացած կրթական համակարգ:

Եվ ուրեմն, հավատարիմ լինելով կառավարության որդեգրած քաղաքականությանը, մշտապես լինելու են դպրոցի և մանկավարժի կողքին։

Հարգելի՛ մանկավարժներ, մաղթում եմ ձեզ և ձեր ընտանիքներին առողջություն, անսպառ եռանդ, ստեղծագործական նոր հաջողություններ և բարօրություն: Թող ձեր սաների ձեռքբերումները միշտ լինեն ձեր աշխատանքի և վաստակի լավագույն գնահատականը: